Enough Misogny2

كفاية ذكورية 2

بداية، الموضوع دا انا زهقت من كتر ما بتكلم فيه بشكل يومي في مكان العمل مع الناس اللي معرفهاش مع أسرتي مع قرايبي أصحابي على الجروبز في المواقع والفيس بوك وفي كل حتة، الحريات طبعا وحق الاختلاف واحترام الآخر وطبعا ( الذكورية ) اللي مجتمع مصر بقا غرقان فيها دلوقتي بشكل غير معقول، هو طبعا طول عمره كان في ملامح للذكورية بس مش زي دلوقتي بسبب عوامل تانية ضافت عليه مزيد من التشدد بعد ما كانت الذكورية طابعها اجتماعي وتقاليد زاد عليها حاجات تانية كتير أسوأ دلوقتي ومن ضمنها التدين السطحي الشكلي والتشدد والتطرف وما يعرف بالوهابية والحكم على الآخرين بمظهرهم وسلوكهم الظاهري.

الذكورية طبعا بتتمارس طول الوقت على المرأة بنسبة كبيرة جدا في المجتمعات الأبوية زي مصر كدا والشرق الأوسط والدول الإسلامية بالأخص وفي دول معينة في أفريقيا، لكن برضو الذكورية بتتمارس ضد الرجل في أحيان كتيرة ومش الرجالة بس اللي ذكوريين في ستات نفسهم ذكوريين بشكل أو بآخر أو موافقين ضمنيا وعلنا بأن الذكورية تتمارس ضدهم وبأن خضوعهم لسيطرة الرجل سواء كان أب أو زوج أو أخ أو قريب من الدرجة الأولى دا واجب أو قدر ومكتوب أو التقاليد اللي لازم يوافقوا عليها، للأسف في ستات كتير بتوافق على مفهوم أن الراجل أسمى وأعلى وأحسن وأكثر كفاءة وأهلية من النساء في حاجات كتيرة جدا في وظايف معينة وفي الحياة عموما وأنها مجرد شيء لإرضاء الزوج وطاعته بعد ما تنتهي من طاعة عائلتها وأبوها ومجرد ربة منزل لازم تربي ولادها وتأكلهم وتغسلهم وتذاكرلهم ( في حالة حصولها على قدر ما من التعليم) وإرضاء زوجها طبعا جنسيا، من غير ما تفكر في حياتها المهنية أو الدراسية أو الجنسية أو أي حاجة بشكل مستقل، هي التبعية اللي ستات كتير بتعاني منها ( في حالة وعيهم بضرورة الاستقلالية) وساعات برضاهم أو لو مغلوبين على أمرهم، اندهشت لما عرفت قريب أن في بعض الاماكن في الريف أو صعيد مصر مش بيرضوا يدوا المرأة ورثها من أبوها أو جوزها (يقفوا ضد القانون والشرع حتى ) عشان متجوزش وجوزها ياخد النصيب الكبير أو كله، والست طبعا تفضل محرومة وتخاف تشتكي للشرطة أو تلجأ للقضاء لأن دا طبعا هيكون خروج عن الأعراف، أزاي ست تنادي وتطالب بحقوقها بشجاعة أزاي؟ تخرج عن عادات وتقاليد العائلة تبقى منحرفة تبقي ضلت طريقها تستاهل العقاب أو السجن في البيت، اه والله، وكمان هنا نسبة كبيرة جدا من المجتمع المصري ذكورا وأناثا مش مؤمنة بحرية المرأة الجنسية وحقها في الكلام عن الموضوع دا او اختيار الزوج اللي هي حاساه او حباه والكلام د كله للرجالة هما أحرار يعملوا اللي هما عايزينه ويخونوا الستات ويجوزوا أكتر من واحدة بحرية تامة في حين ان الست تتسجن ومينفعش تعمل كدا أصلا حرام وخارج عن القانون، الراجل يخرج براءة من أي قضية دعارة والست الليس بتعمل في المجال دا تتحبس 6 شهور كأنها هي المجرمة وهو الشاهد في القضية أي سخافة دا مش قادر اصدق أن الناس بتدي لنفسها الحق أصلا تتكلم عن كيفية ارتداء المرأة لملابسها ويقولوا تلبس وتمشي في الشارع ازاي وتخرج وترجع امتى لحد ما بقت مش عارفة تمشي في الشارع اللي مليان بكلاب سعرانة مستعدة لنهش جسمها و بقوا يدوا مبررات للمتحرش جنسيا يقولك ما هي اللي مش لابسة الطرحة على راسها لحد ما بقوا يتحرشوا بالمنقبات!!!!!! بيدوا ذريعة دايما للراجل عشان يخضع ويشوه في المرأة براحته كدا وكفاية الجدل المتواصل لشيوخ الفضائيات وكلامهم عن الستات يلبسوا ايه بقت بالنسبالهم الست المتدينة الملتزمة هي المنتقبة حتى الحجاب اللي بقوا فارضينه زيه زي الصلاة بقا انحلال لحد ما الشباب اتسرع وبقا حاسس ان الست تابع او مادة لإرضائهم الجنسي وملكهم وملهاش رأي ، الست في مجتمعنا ناضلت سنين عشان توصل لمنصب قاضية وبعد كدا ييجي مجلس الدولة يتعامل معها بنظرة دونية ويرفض تعيينها عندنا عمرنا ما شفنا وافتكر مش هنشوف ست رئيسة للدولة بعد ما كان في ملكات أيام الفراعنة، برا في دول أوروبية هنلاقي وزيرة دفاع وزيرة خارجية رئيسة وزراء رئيسة دولة، هنا في مصر اخرهم يدوا المرأة حقبة وزارية أهميتها مش زي الوزارات سالفة الذكر أبدا ولا هيحصل! المشكلة كبيرة اوي ومش حلها هيبقى امتى.

الذكورية برضو بتمارس ضد الراجل يعني الراجل اللي مش بيقمع المرأة يبقى لا مؤاخذة الراجل لازم يكون ناشف وقاسي وذكوري ورجعى عشنا يبقى راجل أصيل حاجة خلاص تجنن!!!!! وللحديث بقية!!