شرح مبسط للغاية للعلمانية للبسطاء اللي فاكرين انها تساوي الالحاد والبعد عن الدين يا ريت تنشروه
هو يعني إيه علماني و العياذ بالله ؟
by MahmOud Elsaeed on Tuesday, March 8, 2011 at 5:23pm
أيام السادات , كان مخبرين أمن الدولة , أيام الإنتخابات ... بيرحوا يقولوا للناس عن اليساريين بالنص : إنهم بلا دين , و إنهم زنااة محارم !
و طبعاُ كلنا عارفين , إن السادات , نزل التيار الإسلامي الشارع , بقوة , و سمى نفسه الرئيس المؤمن ... عشان يقضي على التيار الناصري اليساري اللي كان ضده بقوة ..........
أيام مبارك ,, صحيح أمن الدولة كان سبب رئيسي في تجهيل معظم المصريين , إلا إن الجهل لعب دوره بشكل قوي
بقا عندنا أفكار جاهزة نمطية بدون تفكير
و فعلاً كان الناس عندها حق , لأن لا كان فيه كتاب و لا إذاعة و لا قناة تنوير ... و الكل كان بيجري ورا أكل عيشه
زي مثلاً
إن المثقفين : وحشين , عشان ضد الدين
علماني : يعني بلا دين كافر
ليبرالي : يعني عاوزنا نبقى زي اوروبا , و تنتشر الزنا بين الناس
و أفكار زي دي كتير , عن المحجبات ... إلخ إلخ
طب لما تيجي تسأل واحد زي دا عرفت منين الكلام دا , يقولك الشيخ فلان و علان ...
و لما ترد عليه : يقولك طوالي لحم العلماء مسموم ,,, و ممكن يكفرك كمان
اسألوا أي ناشط سياسي في الحزب الوطني يعني ايه ليبرالية : مش هيعرف يرد , مع ان الحزب الوطني مفروض انه كان بيقول على نفسه ليبرالي
دي الفكرة .. اننا كلنا عايشيين في أشكال خارجية للافكار ,,,, اننا مش بنستوعب الافكار كما هى ,,,, و بنعيش على هواميشها
اننا بنلجأ للشيخ أو القس لما نتكلم في السياسة و العلم .......مع ان الشيخ لا دارس سياسة ولا علم
و لما نقول الجملة دي ,, اللي فاتت , ان رجل الدين ميفهمش في حاجة
مش عاوز حد يطلعلي و يقولي : لا الدين ربنا نزله لكل حاجة
هرد عليك , عشان ادافع عن الدين ,,, مش عشان ادافع عن تظرتي السياسة , و اققولك : الرسول في اي دين كانت مهمته الاساسية ,,,, الاخلاق و العبادة ..... لكن منزلش القرءان مثلا عشان يقولنا ايه نظم الحكم السياسة ,,,, ولا نزل و قالنا ازاي نعالج المرض الفلاني ,,, و ازاي و ازاي
كل شيء زاد عن حده , ضر و منفعش
لما الشيخ يتعدي حده و يتكلم في اللي مفروض يتكلم فيه رجال القضاء او السياسة او العلم ,,, هيضر الدين اكتر ما يضر الناس .....
لان الدين منزلش لكدا ....
بـــــــــس مش معنى كدا
ان السياسة تنفصل على الدين كلياً
الدين مباديء أخلاقية
السياسة , مفروض تستلهم المباديء الاخلاقية دي
زي حزب العدالة و التنمية ,,, في تركيا , اللي ديما الاخوان بيضربوا بيه المثل , رغم انه حزب علمااااااااااني ,,,,,,, لكن مرجعيته اسلامية , بمعني : ان مباديء الاسلام مستلهمة في الحكم ,,,,,, مش حكم باسم الاسلام
فصل الدين عن السياسة , مش معناه في مصر
و لازم نتفق ان مصر , ليه طعم تاني ,,, لا هى تركيا و لا هى السعودية
فصل الدين عن السياسة مش معناه فصل الدين عن التشريع القانوني بشكل كامل
مش معناه اننا بقينا كفرة
فصل الدين عن السياسة , يعني محدش يجي يقولك انا بتكلم باسم الله و هحكم باسم الله ,,,,
يعني تبقى عندتا دولة ,,, مخايدة ,,, بقول تاني محايدة , لا مسلمة ولا مسيحية ولا بوذية ولا ملحدة
دولة محايدة
تدي حقوق متساوية للحيااااااة لكل مواطن اتولد على ارض مصر
من غير تمييز لا من حيث الدين ولا الشكل و لا النوس و لا الجنس
و احب اوضح نظرية العلمانية من وجهة نظري انا البسيطة
لازم نعرف يعني ايه دين
انت مسلم , او مسيحي او ملحد
و كل انسان عنده اعتقاد بادلة معينة ان تفكيره صح ......
بص لكوكب الارض من فوووق كدا
و اتخيل كام ديانة و كم الملايين المختلفة في الاعتقاد الديني دا
مهما كان الدين في الاخر ,,, اعتقاد فلسفي ,,,, يعني مش حاجة ملموسة على ارض الواقع ,,, يعني افتراض و ايمان بنظريات معينة ان الارض اتخلقت كدا و هتنتهي كدا و لما نموت هنشوف كذا و كذا و هنتحاسب عليه
يعني في الاخر ,,, لو حكمنا بدين واحد ,,,,,, بنظريات دين واحد ,,, على ارض واحدة فيها بشر مختلفين دينيا او من حق الناس اللي هتعيش بعد كدا تختار دينها و تختلف دينيا ...... مهما كان تسامح الدين دا ,,, هنقتل حاجة اسمها التنوع الفكري و الديني
اللي هوا اصل الديمقراطية , اللي مات عشانها 400 واحد و اتصاب اكتر من 6000
لكــــــــــــــــــــــن
السياسة علم : علم يعني مبني على اساس واقعي , اساس الحاضر و الماضي و المستقبل و التاريخ .... عشان البشر اللي على الارض مش عشان البشر اللي ماتوا
علم عاوز يخدم البشر كلهم ,,,,, بدون تفريق او تمييز .... لان العلم بلا دين
لان الكومبيوتر اللي انته بتقرا عليه دا ,,,,, مصنوع في الصين او الهند الو المانيا او او و اللي شاركوا في اختراعه الاف من البشر مختلفة دينيا و فكرياً
منقدرش ندخل الدين , العلم الغيبي , بالسياسية , العلم الواقعي ...
لان دا
ضد الدين اولا
و ضد السياسة ثانيا
--
نحكم التاريخ
الدول اللي بيسموا نفسهم اسلامية ,,,, و الاسلام منهم براء
السعودية , دولة فاشلة سياسيا و علميا و اقتصاديا ,,, و كل اللي مخليها دولة ذات صيت هو البترول
السودان ,,,, اخر انجازات الحكم الديني : انفصال الشمال عن الجنوب , لان البشير صمم يضحك على البشر و يتمسك بحكمه بخدعة مشهورة ,و اسمها تطبيق الشريعة الاسلامية
و مش عارف ازاي اختذل الاسلاااااااااااام العظيم في مجرد حدود ......
انفصل الشمال عن الجنوب
و عشان بردو يفضل ماسك الحكم
قال لشعب الشمال كدا بقى هنحكم بالشريعة براحتنا ,,, و محدش بقدر يعترض
و الناس مبسووووطة ,,,, و هللتله
و السودان : دولة فاشلة سياسيا و اقتصاديا و علميا ...
افغنستان
افغنستان : الصورة اللي كل شيوخ السلفية في مصر بينادوا بيها
و اعتقد مش محتاجة كلام ....
ايران
دولة فاشلة سياسيا و اقتصاديا و علميا
و كل البروباجاندا الشيعية بتصورها على انها دولة ناجحة جدا
مع انها قمة في الفشل ...
مصر تعتبر اقوى منها ,, في كل المجالات رغم الفساد اللي كنا فيه
التاريخ الاسلامي
التاريخ الاسلامي مرتبط باشخاص يخطئون و يصلحون
يعني لما ننقد التاريخ الاسلامي مش بننقد الاسلام ,, لا بننقد اشخاص
و من الواضح ... ان التاريخ الاسلامي كل مصايبه كانت من الاستبداد السياسي ,,, و اللي بدا من اول معاوية
و من الغرور ,, اننا نتخلف عن مباديء البشر الحالية اللي وصولولها بعد تاربخ طويل من الكفاح العلمي و الفلسفي عشان نرجع تاريخ قديم .... كنا بنتعقد فيه اننا كنا في عزة و كرامة و انتصار
لما نبص للماضي , نبص عشان نتعلم منه مش عشان نرجعه زي ما هو
لما نبص للماضي , لازم نبص للمستقبل بردو
و لازم نعترف بفشلنا ,,,,,, و منكنش بالغرور الرهيب دا
و نبطل نبرة : احنا مؤمنيين و هما كفرة
حاجة حابب اوضحها
العلمانية الليبرالية الشيوعية اي مبدأ سياسي
هو مبدأ انساني
بمعنى انه مش للكفرة اللي برا بس دا للعالم كله
زي ما قولت السياسة علم بلا دين زي الكيميا مثلا
مش لمسحيي او يهودي دون مسلم مثلا
فاكيد علمانية اوروبا غير علمانية مصر ,,,, او ليبرالية فرنسا غير ليبرالية مصر
او اشتراكية الصين غير اشتراكية مصر
لان ثقافتنا بتفرض نفسها على النظم السياسية دي
غصب عن اي شيء
لان السياسة فن التعامل مع الشارع
و كل فكرة و كل مفهوم من النظم دي
ممكن تتبطق على العالم الاسلامي ,,,, و بدون تدخل في الدين او فصله عن الحياة
مثال اخير
اميركا ... اكبر مثال لاكبر دولة غلمانية
لكن تعرفوا ان اكبر اموال تصرف على الدين
اكبر تغلغل للدين في الاعلام
في امريكا
انها من اكتر الدول المتدينة مسيحياً
العلمانية مش بتخنق الدين , اد ما بتوفرله الحياة المناسبة ليه ,,, الظروف المناسبة انه يؤدي دروه ... و ينشر اخلاقه
يا ريت كلنا نبطل غرور
ونحاول نعرف قبل ما نهاجم
تعليقات
إرسال تعليق